La leporo kaj la vulpo

Jen kuŝis vulpo sub la betul’
ĉe l’ eriko, ĉe l’ eriko,
leporo venis — facilkorul’ —
tra l’ eriko, tra l’ eriko.
Ho, kiel bela kaj brila tag’!
la sun’ radias al mont’ kaj lag’,
kaj l’ eriko, kaj l’ eriko. — Trala la la la.

La vulpo ridis sub la betul’
ĉe l’ eriko, ĉe l’ eriko,
leporo saltis — bonhumorul’ —
tra l’ eriko, tra l’ eriko.
Ho, kiel ĝoja do estas mi!
Ho, kiel lerte saltadas vi
tra l’ eriko! tra l’ eriko! — Trala la la la.

La vulp’ atendis sub la betul’
ĉe l’ eriko, ĉe l’ eriko,
alvenis nun la kompatindul’ —
tra l’ eriko, tra l’ eriko..
Kompatu, Dio! ĉu estas vi!
Sed ĉu vi dancas do tie ĉi
tra l’ eriko? tra l’ eriko? — Trala la la la.